Drejtuesi politik i PD për Qarkun Tiranë, Belind Këlliçi, ka vijuar takimet me qytetarët e kryeqytetit në kuadër të protestës kombëtare që do të zhvillohet më 8 shkurt. Këlliçi ka deklaruar se protesta do të jetë madhështore dhe ka ndarë ndjesinë e qytetarëve të cilët, sipas tij, janë të shqetësuar nga korrupsioni dhe keqqeverisja e qeverisë Rama.

Në një postim në Facebook, ai theksoi se takimet me banorët e Tiranës, si dhe në çdo cep të Shqipërisë, kanë nxjerrë në pah vuajtjet e qytetarëve nga “korrupsioni, babëzia dhe keqqeverisja” e qeverisë që ka mbajtur pushtetin për 12 vjet. Këlliçi akuzoi Edi Ramën se vazhdon të “spastrojë Shqipërinë nga shqiptarët”, duke përmendur gjithashtu shpenzimet luksoze të kryeministrit për verë të shtrenjtë Romanee Conti, ndërkohë që qytetarët e thjeshtë po përballen me vështirësi të mëdha.

Ai bëri thirrje që në protestën e 8 shkurtit, ora 17:00, të jetë “dita jonë” dhe theksoi se opozita ka vetëm një llogaridhënie ndaj qytetarëve të zakonshëm të Shqipërisë.