Drejtoria e Forcës së Posaçme Operacionale (FAST Albania) ka finalizuar me sukses operacionin “Operacionalja 25”, duke vënë në pranga shtetasin Roy Garin, i cili ishte shpallur në kërkim ndërkombëtar.

Operacioni, i koordinuar nga rrjeti ndërkombëtar ENFAST dhe Zyrën Federale të Policisë Kriminale të Gjermanisë (BKA), u realizua në Tiranë, në zonën e quajtur “Komuna e Parisit”.

Garin, një shtetas izraelito-kanadez, akuzohet për mashtrim të përsëritur në Gjermani, ku ka kryer veprime kriminale për të cilat Kodi Penal i Gjermanisë parashikon dënim deri në 15 vjet burgim. Gjykata e Bambergut në Gjermani kishte lëshuar një urdhër ndalimi për të.

Policia e Shtetit, në bashkëpunim me Interpol Tirana dhe homologët ndërkombëtarë, po finalizon procedurat për ekstradimin e tij në Gjermani.