Me hidhërim është marrë lajmi për ndarjen nga jeta të Baba Hekuran Nikollarit, dervishit të Teqesë së Baba Aliut në Alipostivan, i cili u shua sot në moshën 60-vjeçare në Përmet.

Presidenti i Republikës, Bajram Begaj, ka shprehur ngushëllimet e tij për këtë humbje të madhe për komunitetin bektashi dhe gjithë besimtarët.

“Mësova me dhimbje kalimin nga kjo jetë të Baba Hekuran Nikollarit, klerikut që vazhdoi veprën e Baba Aliut, duke shërbyer si frymëzim dhe udhërrëfyes për komunitetin bektashi të qarkut të Gjirokastrës e më gjerë.
Falë punës së tij të jashtëzakonshme, Teqeja e Baba Aliut në Alipostivan u ringrit nga rrënojat dhe u kthye në një simbol të vlerave shqiptare, monument të qetësisë, dashurisë dhe ndihmës për të pamundurit.”

Presidenti Begaj e cilësoi Baba Hekuran Nikollarin si një figurë me kontribut të madh në ruajtjen e identitetit kombëtar dhe harmonisë fetare.

Bashkia e Përmetit gjithashtu reagoi për ndarjen nga jeta të tij, duke theksuar:

“Me hidhërim të thellë morëm lajmin e ndarjes nga jeta të Baba Hekuran Nikollarit, një njeri i përkushtuar ndaj besimit, vlerave të kombit dhe gjithë komunitetit. Ai ringriti nga rrënimi Teqenë e Alipostivanit, duke e bërë një qendër të rëndësishme shpirtërore dhe një strehë dashurie për këdo që e vizitonte.”

Baba Hekurani do të kujtohet si një udhëheqës shpirtëror i përkushtuar, që punoi pa u lodhur për besimin, paqen dhe harmoninë fetare. Ngushëllime familjes, besimtarëve bektashinj dhe të gjithë atyre që e njohën dhe e vlerësuan figurën e tij.