Një shtetas italian, 51-vjeçari Antonio Goffredi, i shpallur në kërkim ndërkombëtar nga autoritetet venezueliane, është arrestuar mbrëmjen e kaluar në Portin e Durrësit nga policia kufitare, me qëllim ekstradimin e tij në Venezuela.

Bazuar në informacione të siguruara nga inteligjenca policore, shërbimet e sigurisë intensifikuan kontrollet, pasi kishin të dhëna se Goffredi po përpiqej të udhëtonte nga Durrësi me traget drejt Italisë. Ai u ndalua dhe u arrestua gjatë tentativës për të dalë nga Shqipëria.

Antonio Goffredi ishte shpallur në kërkim nga Interpol Caracas që në vitin 2017, pas caktimit të masës “Arrest në burg” nga Gjykata e Caracas për veprën penale të mashtrimit, sipas Kodit Penal të Venezuelës.

Interpol Tirana po vijon bashkëpunimin me autoritetet venezueliane për realizimin e procedurave të ekstradimit të tij.