Portieri i Barcelonës, Marc-André Ter Stegen, ka reaguar ashpër ndaj mediave pas spekulimeve që ndarja e tij me bashkëshorten, Daniela Jehle, ishte shkaktuar nga një person i tretë. Javën e kaluar, çifti njoftoi ndarjen përmes një deklarate të përbashkët në rrjetet sociale, por së fundmi, pas shpërndarjes së informacioneve të pavërteta, Ter Stegen ka vendosur të sqarojë situatën.

Në një postim në Instagram, portieri gjerman ka akuzuar drejtpërdrejt mediat “Catalunya Radio & Grupo 3Cat” për përhapjen e lajmeve të rreme:
“Jam i tronditur dhe i zhgënjyer nga menaxhimi i keq dhe mungesa e lidershipit e kontrollit në ‘Catalunya Radio & Grupo 3Cat’, të cilët kanë përhapur lajme të rreme dhe kanë shkelur të drejtat personale.”

Ai përmend gazetarët Juliana Canet, Roger Carandell dhe Marta Montaner si përgjegjës për përhapjen e informacioneve të pavërteta që kanë dëmtuar reputacionin e ish-bashkëshortes së tij:

“Nuk ka pasur asnjë tradhti nga Daniela, nuk ka persona të tretë të përfshirë. Kjo është një e vërtetë absolute. Siç është bërë publike, Daniela dhe unë kemi vendosur të ndjekim rrugë të ndara në kushte të mira, duke ruajtur një komunikim të bazuar në besim.”

Në përfundim të deklaratës, Ter Stegen thekson se është e papranueshme që media publike të përhapë akuza të rreme dhe të sulmojë personalisht Danielën:
“Dëmi është i pariparueshëm.”