Dy shtetas janë arrestuar në Tiranë në kuadër të operacionit policor të koduar “Interruption”, pasi u kapën në flagrancë duke tentuar të shisnin 1 kg e 700 gram lëndë narkotike të dyshuar si kanabis.
Gjatë aksionit, autoritetet sekuestruan gjithashtu 3 kg lëndë narkotike dhe pajisje elektrike të përdorura për kultivimin e bimëve narkotike në ambiente të mbyllura.
Të arrestuarit janë identifikuar si Reshat Qatromi, 36 vjeç, dhe Ledin Kazanxhi (Allamani), 27 vjeç, të dy banues në Tiranë. Ata u kapën në rrugën “Memo Meto”, teksa tentonin të shisnin sasinë e drogës.
Në kuadër të operacionit “Interruption” u arrestuan shtetasit Reshat Qatromi dhe Ledin Kazanxhi (Allamani)
“DVP Tiranë/Finalizohet operacioni policor i koduar “Interruption”.
U kapën në flagrancë në tentativë për të shitur 1 kg e 700 gram lëndë të dyshuar narkotike kanabis, vihen në pranga 2 shtetas.
Sekuestrohen 3 kg lëndë narkotike kanabis, paisje elektrike që shërbejnë për kultivimin e bimëve narkotike në ambiente të mbyllura dhe prova të tjera materiale.
Specialistët e Seksionit për Hetimin e Narkotikëve të DVP Tiranë, në vazhdën e operacioneve të zhvilluara në fushën e narkotikëve, si dhe si rezultat i administrimit të menjëhershëm të inteligjencës informative, për një rast të shitjes të lëndës narkotike cannabis sativa, kanë finalizuar operacionin policor të koduar “Interruption”.
Në kuadër të këtij operacioni, u arrestuan shtetasit R. Q., 36 vjeç dhe L. K.(A.), 27 vjeç, të dy banues në Tiranë.
Këta shtetas u kapën në flagrancë në rrugën “Memo Meto”, me një qese me 1 kilogram e 700 gram lëndë të dyshuar narkotike cannabis sativa, që e posedonin me qëllim shitjen.
Në vijim të veprimeve, gjatë kontrollit në banesën e 36-vjeçarit, u gjet një sasi tjetër lëndë narkotike kanabis, pajisje elektrike që shërbejnë për kultivimin e bimëve narkotike në ambiente të mbyllura dhe prova të tjera materiale, të cilat u sekuestruan në cilësinë e provës materiale. Materialet procedurale i kaluan Prokurorisë, për veprime të mëtejshme”, njofton policia..
