Vlore – 15 shkurt 2025 – Robert Rrapaj, një punonjës i Spitalit të Vlorës, ka humbur jetën pas një ndërhyrjeje kirurgjikale për heqjen e gurëve në tëmth. Familjarët e tij pretendojnë se mjekët kanë treguar papërgjegjshmëri dhe neglizhencë, duke mos reaguar në kohë ndaj shenjave të një problemi kardiak.

Familjarët denoncojnë: “Mjekët shpërfillën simptomat e një infarkti”
Vëllai i të ndjerit ka publikuar një mesazh në rrjetet sociale, duke treguar se analizat e gjakut të Robertit kishin treguar niveli të lartë të troponinës, një shenjë paralajmëruese për një atak kardiak. Megjithatë, operacioni u krye dhe pacienti u la të largohej nga spitali me një tension të lartë, pa ndjekje të mëtejshme mjekësore.

7 ditë më pas, një tjetër gabim fatal
Pas një jave, Roberti u paraqit në urgjencë me dhimbje të forta në gjoks. Megjithëse ekipi mjekësor ndoqi protokollin, vendimi për ta dërguar në Tiranë u mor vetëm pas disa orësh vonesë. Fatkeqësisht, ai ndërroi jetë gjatë rrugës, pranë Fierit.

Kërkohet hetim: “Vdekja mund të ishte parandaluar”
Familjarët e tij janë të shokuar dhe kërkojnë drejtësi, duke bërë thirrje për një hetim të thelluar mbi rastin. Ata insistojnë se humbja e Robertit mund të ishte shmangur, nëse mjekët do të kishin marrë masat e duhura.