Gjilan, 14 Mars 2025 – Një aksident i rëndë trafiku ka ndodhur sot rreth orës 10:00 në rajonin e Gjilanit, ku për pasojë kanë humbur jetën dy vajza të reja, Arbnora Basha dhe Antiana Thaqi, studente në Universitetin “Kadri Zeka”.

Aksidenti ka përfshirë një kamion dhe një automjet tjetër, ku dyshohet se manovrat e papërshtatshme të shoferit të kamionit çuan në përplasjen fatale. Një pasagjere tjetër që ndodhej në automjet është dërguar me urgjencë në spital për trajtim mjekësor.

Zëdhënësi i Policisë së Gjilanit, Ismet Hashani, ka konfirmuar ngjarjen dhe ka bërë me dije se hetimet janë në zhvillim e sipër. Policia ka ndaluar drejtuesin e kamionit dhe po analizon pamjet e kamerave të sigurisë për të sqaruar rrethanat e plota të aksidentit.

Lajmi ka shkaktuar dhimbje të madhe në komunitetin akademik dhe më gjerë. Universiteti “Kadri Zeka” ka shprehur ngushëllimet për familjet e viktimave, duke e cilësuar humbjen e tyre si një tragjedi të madhe.

Autoritetet apelojnë për kujdes të shtuar në rrugë dhe respektim të rregullave të trafikut për të shmangur aksidente të tilla fatale.

“Drejtuesi i kamionit, mashkull kosovar i lindur në vitin 1970, dyshohet se ka bërë një kthim të pasigurt, duke penguar një automjet që ishte në tejkalim. Si pasojë e kësaj, drejtuesja e automjetit ka humbur kontrollin mbi mjetin për shkak të mos përshtatjes së shpejtësisë me kushtet e rrugës dhe ka tentuar të shmangë goditjen me kamionin, duke u rrokullisur jashtë rrugës,” tha Hashani.
Policia dhe autoritetet e tjera përkatëse po vazhdojnë hetimet për zbardhjen e plotë të aksidentit, ndërsa ngushëllime për humbjen e jetëve të rinjve janë shprehur nga komuniteti dhe familjarët