Gjatë bashkëbisedimit në podkastin “Flasim” me kryeministrin Edi Rama, kandidati i ri i Partisë Socialiste për qarkun e Beratit, Julian Zyla, nuk i mbajti dot lotët teksa kujtoi momentet e rëndësishme të jetës së tij dhe të atin e ndjerë.

Duke folur për angazhimin e tij në politikë, Zyla rrëfeu se pasioni i tij për këtë fushë ka qenë i pranishëm që në rini. Ai tregoi se ka studiuar politikë dhe marrëdhënie ndërkombëtare në Romë, por momenti që e preku më shumë ishte ai i përfundimit të studimeve master në vitin 2010.

“Doja të tregoja një nga momentet më të rëndësishme të jetës sime. Ishte fundi i janarit 2010, kur përfundoja studimet master. Ishte dita kur do prezantoja temën e diplomës. Dola mirë dhe arrita synimin. Kryetari i komisionit na tha aty: ‘Nderoni veten tuaj’… Aty ishte babai im dhe shoku im ia përktheu… (përlotet). Ndjesë, kam tre vite që s’e kam,” – u shpreh Zyla me emocion.

Momenti i tij i ndjerë preku edhe kryeministrin Rama, i cili e mbështeti dhe e inkurajoi gjatë bisedës. Kandidimi i Julian Zylës për zgjedhjet e ardhshme vjen si pjesë e një përpjekjeje për të sjellë emra të rinj dhe të formuar në politikën shqiptare.