Bashkimi Evropian ka përgëzuar udhëheqësit e Armenisë dhe Azerbajxhanit për përfundimin e negociatave mbi një marrëveshje paqeje dhe u ka bërë thirrje që ta nënshkruajnë traktatin sa më shpejt.

Lajmi u konfirmua të enjten nga Ministria e Jashtme armene në Jerevan, e cila njoftoi se marrëveshja është gati për firmosje. Po ashtu, Baku konfirmoi se negociatat kishin përfunduar, por theksoi nevojën që Armenia të ndryshojë kushtetutën e saj dhe të heqë dorë nga çdo pretendim territorial ndaj Azerbajxhanit.

Shefi i Këshillit Evropian, Antonio Costa, e cilësoi këtë zhvillim si “një hap vendimtar drejt normalizimit të plotë të marrëdhënieve dhe hapjes së rajonit”.

Kërkesa kryesore e Azerbajxhanit mbetet që Armenia të heqë nga kushtetuta çdo referencë për shpalljen e saj të pavarësisë, një element që Baku e sheh si pretendim territorial mbi Nagorno-Karabak.