Policia e Shtetit ka finalizuar me sukses operacionin policor të koduar “Difficult conditions”, duke kapur dhe arrestuar dy shtetas shqiptarë të shpallur në kërkim ndërkombëtar nga autoritetet italiane që prej vitit 1999.

Të arrestuarit janë:
• Andon (alias Afrim) Sina, 51 vjeç
• Niko (alias Faslli) Sina, 48 vjeç

Ata u lokalizuan dhe u kapën në fshatin Rreth-Kale, Dibër, pas një operacioni të zhvilluar në kushte të vështira të terrenit dhe motit.

Të dënuar për vrasje në Itali

Gjykata e Apelit të Napolit i ka dënuar me 14 vjet e 11 muaj burg secilin, për veprat penale “Vrasja me dashje e kryer në bashkëpunim” dhe “Vrasja e mbetur në tentativë”.

Ngjarja ka ndodhur më 22 shtator 1999, në komunën Griciniano d’Aversa, Itali, ku ata vranë me mjete të forta dhe prerëse shtetasin shqiptar B.C. dhe plagosën rëndë një tjetër shqiptar, F.S., për konflikte mbi ndarjen e të ardhurave nga aktivitetet e tyre të paligjshme.

Operacion në bashkëpunim me autoritetet italiane

Operacioni u zhvillua nga Drejtoria e Forcës së Posaçme Operacionale, në bashkëpunim me Zyrën e Ekspertit të Sigurisë në Shqipëri dhe Shërbimin për Bashkëpunim Ndërkombëtar të Policisë Italiane.

Falë koordinimit të ngushtë me Qendrën Operative dhe Skuadrën Fluturuese të Casertës, si dhe me Prokurorinë e Përgjithshme pranë Gjykatës së Apelit të Napolit, u arrit kapja e dy të kërkuarve, të cilët do të ekstradohen drejt Italisë.

Policia e Shtetit vijon me përkushtim operacionet për kapjen e personave në kërkim ndërkombëtar, duke dëshmuar angazhimin e saj në luftën kundër krimit dhe bashkëpunimin e ngushtë me partnerët ndërkombëtarë.