Në një përballje televizive, përfaqësuesi i Koalicionit Euro-Atlantik në Vlorë, Gjergji Nika, ka bërë publike detaje mbi përbërjen e listës së kandidatëve të këtij subjekti politik.

Sipas Nikës, në listë janë përfshirë edhe emra pensionistësh të nderuar, të cilët do të japin dorëheqjen pas miratimit të listave, duke i hapur rrugë të rinjve.

“Ne kemi dorëzuar katër emra pensionistësh të nderuar, të cilët, në momentin që listat do të miratohen, do të japin dorëheqjen. Kjo është bërë për të krijuar një balancë dhe për të hapur mundësi për të rinjtë. Pas dorëheqjes së tyre, do të përfshihen 12 kandidatë të rinj në listë,” – u shpreh Nika.

Ai theksoi se lista është ndërtuar në mënyrë të strukturuar dhe përfaqëson një përzierje të drejtë mes të rinjve, grave dhe figurave me eksperiencë.

“Ne kemi bërë një përzierje të kujdesshme: 30% e kandidatëve janë të rinj, 30% janë gra – një në çdo tre kandidatë është një zonjë – dhe pjesa tjetër është e përbërë nga individë të angazhuar në struktura,” – tha ai.

Deklarata e tij vjen në një moment kur partitë politike po finalizojnë listat e kandidatëve për zgjedhjet e ardhshme, ndërsa përbërja e tyre mbetet një çështje kyçe për përfaqësimin e grupeve të ndryshme shoqërore.