Sulmuesi i Chelsea-t, Cole Palmer, nuk do të jetë i gatshëm për dy ndeshjet e Anglisë në eliminatoret e Kupës së Botës, për shkak të një dëmtimi muskulor.
Palmer nuk ishte i pranishëm në humbjen e Chelsea-t ndaj Arsenalit dhe trajneri i “Bluve”, Enzo Maresca, konfirmoi se ai nuk do të jetë në dispozicion as për kombëtaren angleze. “Palmer ka nevojë për një skanim për të vlerësuar dëmtimin. Nuk besoj se do të jetë gati për ndeshjet e Anglisë”, tha Maresca pas takimit.
Në mungesë të Palmer, trajneri Thomas Tuchel është detyruar të bëjë ndryshime në listën e kombëtares. Mes kandidatëve për ta zëvendësuar është Morgan Gibbs-White, i cili mund të grumbullohet për ndeshjet e Anglisë kundër Shqipërisë dhe Letonisë.
Chelsea po përballet me disa mungesa të rëndësishme, pasi përveç Palmer, të dëmtuar janë edhe Nicolas Jackson dhe Noni Madueke. Maresca shpreson që të paktën një pjesë e lojtarëve të rikuperohen në kohë për përballjen me Tottenham-in më 3 prill.
