Peter Sorensen, i dërguari i Bashkimit Evropian për dialogun mes Kosovës dhe Serbisë, pritet të mbërrijë sot në Kosovë për një vizitë zyrtare. Gjatë qëndrimit të tij, Sorensen do të zhvillojë takime me udhëheqësit më të lartë të Kosovës, presidenten Vjosa Osmani, dhe kryeministrin Albin Kurti. Takimi me presidenten Osmani do të nisë në orën 09:45, ndërsa ai me kryeministrin Kurti do të mbahet në orën 10:30. Pas takimit me Kurtin, Sorensen do të pritet edhe nga Besnik Bislimi, zv.kryeministri i parë për Integrim Evropian, Zhvillim dhe Dialog i Republikës së Kosovës.

Vizita e Sorensen vjen në një periudhë të rëndësishme për Kosovën dhe për marrëdhëniet e saj me Bashkimin Evropian, me fokus në dialogun Kosovë-Serbi, sfidat e zbatimit të marrëveshjeve të arritura dhe perspektivën e integrimeve evropiane për Kosovën. Kjo është vizita e parë e Sorensen në Kosovë që nga emërimi i tij si përfaqësues i posaçëm i BE-së.