Një 20-vjeçar është arrestuar nga Policia e Tiranës pasi në automjetin e tij janë gjetur kartmonedha euro të dyshuara të falsifikuara. Gjatë operacionit policor të koduar “False”, shërbimet e Forcës së Posaçme “Shqiponja” dhe specialistët e Seksionit për Hetimin e Krimeve Ekonomiko-Financiare, kanë sekuestruar 2800 euro të dyshuara si të falsifikuara.

Operacioni u realizua pas informacioneve të siguruara nga inteligjenca policore për një shtetas që mund të kishte në posedim kartmonedha false. Automjeti i ndaluar ishte i drejtuar nga shtetasi A. Q. dhe kishte pasagjerë shtetasit D. M. dhe S. Q. Gjatë kontrollit, kartmonedhat e falsifikuara u gjetën tek pasagjeri S. Q., i cili u arrestua në flagrancë për veprat penale “Falsifikimi i monedhave” dhe “Mashtrimi”, mbetur në tentativë.

Po ashtu, u proceduan penalisht edhe dy shtetas, A. Q. dhe D. M., për moskallëzimin e krimit. Autoritetet po vazhdojnë hetimet për rastin.