Producentja e Big Brother VIP Kosova 3, Olsa Muhameti, ka reaguar mbi largimin e Gjestit nga formati kosovar dhe kalimin e tij në Big Brother VIP Albania. Ajo u shpreh e habitur që Top Channel e mori një personazh që ishte krijuar nga produksioni i tyre.
“Nuk e prisja që Top Channel do ta merrte, nuk e mendova kurrë që do të merrnin një personazh nga ne. Kjo tregon që paskemi bërë një punë të mirë. Gjestin nuk e nxorëm ne, e nxori publiku. Mund ta pengonim, por nuk e bëmë. Me kontratë nuk mund të largohej, ne e lejuam”, tha Olsa.
Producentja theksoi se Gjestit i mungon një reformulim i karakterit të tij brenda lojës dhe se produksioni në Shqipëri duhet ta ndihmojë më shumë në këtë aspekt.
“Gjesti duhet të ndryshonte. Një personazhi të ri-formatohet i duhet ndihmë profesionale. Ai erdhi i shkëputur nga problemet e veta të rehabilitimit, e morëm ne, ia dhamë dorën dhe e futëm në Big Brother. U lut shumë dhe edhe neve na pëlqeu”, shtoi ajo.
Muhameti vuri në dukje se Gjestit i nevojitet më shumë mbështetje nga produksioni aktual për të ngritur nivelin e tij në lojë.
