Tragjedia e rëndë në diskotekën “Pulse” në Koçan të Maqedonisë së Veriut, ku humbën jetën 59 persona, ka shkaktuar reagime të forta në gjithë vendin. Protestues të revoltuar kanë shpërthyer në qytetin e Koçanit, duke kërkuar përgjegjësi nga autoritetet për tragjedinë që ka tronditur gjithë rajonin.

Sipas mediave vendase, qindra qytetarë kanë protestuar para bashkisë së qytetit, duke hedhur vezë dhe shishe drejt godinës, si dhe duke thyer dyert dhe dritaret. Ata kanë kërkuar të takohen me kryetarin Ljubço Papazov, i cili tashmë ka dhënë dorëheqjen.

Më pas, turma është drejtuar drejt lokalit të dytë të pronarit të diskotekës fatale, ku protestuesit kanë thyer xhamat e dyqanit në shenjë revolte.

Ndërkohë, në kryeqytetin Shkup, mijëra studentë dhe nxënës janë mbledhur në sheshin e Universitetit Shtetëror “Kirili dhe Metodi”, duke ndezur qirinj në kujtim të viktimave. Organizatorët kanë njoftuar se tubime të ngjashme do të mbahen çdo ditë deri më 21 mars.

Autoritetet kanë nisur hetimet për tragjedinë, ndërsa opinioni publik kërkon përgjigje për përgjegjësit e kësaj katastrofe.