Kryeministri Edi Rama ka ironizuar premtimet elektorale të opozitës, duke e cilësuar këtë periudhë si “shitja e qilimave fluturues”, ku të gjithë premtojnë shifra të larta për paga dhe pensione.

“Merre qilimin tim dhe pensionin do ta kesh 500 euro. Merre qilimin tim dhe pagën do ta kesh 1500 euro. Merre qilimin tim se do të marrësh pronat e gjyshit. Kush ta hajë, ta hajë. Kur s’ke gjë në dorë, mund të premtosh të gjitha se s’ke gjë në dorë,” tha Rama.

Ai solli në kujtesë edhe një histori me ish-kryeministrin Fatos Nano, duke treguar një episod ku një qytetar kërkonte kthimin e pronave dhe sugjeronte një zgjidhje “të thjeshtë”, duke ia dhënë tokën atij që i takon. “Fatosi iu përgjigj se kjo ide është shumë e fuqishme, por duhet ta ndash me Sabri Godon se ai s’ka gjë në dorë,” shtoi Rama, duke nënkuptuar se opozita premton gjithçka, pasi nuk ka pushtet për ta realizuar.