Ish-kandidatja për primare në Partinë Demokratike, Alesia Balliu, ka shprehur publikisht pakënaqësinë e saj mbi procesin e zhvilluar brenda partisë, duke e cilësuar atë si një “fasadë” që nuk respekton transparencën dhe drejtësinë.

Balliu ka denoncuar se procesi i primareve është përdorur për të manipuluar dhe zëvendësuar kandidatë që kishin kontribuar në opozitën ndaj qeverisë, përfshirë Dash Sulën, veten e saj dhe katër gra të tjera të angazhuara me PD-në.

Sipas saj, individë me lidhje të drejtpërdrejta me Luçiano Boçin dhe Flamur Nokën janë futur në lista, ndërsa ata që kishin bërë denoncime publike dhe kishin zhvilluar aktivitete politike në mbështetje të PD-së janë lënë jashtë.

“Ne morëm pjesë në primare dhe kemi bërë denoncime. Javën e fundit, në garë futet vajza e katapultuar nga Boçi dhe Noka, ndërsa lihen jashtë Dash Sula, unë dhe katër zonja të cilat ndihemi të ofenduara. Pas primareve, më kontakton një qytetar dhe më thotë që primaret i ka shitur Boçi dhe Noka.

Unë kontaktova Nokën, por nuk mora një përgjigje. Ne, katër gra që kemi vendosur fytyrën tonë me denoncime ndaj qeverisë, nuk jemi pjesë e listës. Ky proces ishte një fasadë, pasi vajza që fitoi ishte parazgjedhur të ishte në listën e mbyllur. U zëvendësuam me dikë që ka Universitetin e Elbasanit. Këtu shihet qartë pasoja,” – tha Balliu.

Ajo ka kritikuar hapur procesin, duke theksuar se primaret nuk pasqyruan një garë të ndershme dhe të hapur, por ishin një mekanizëm formal për të justifikuar zgjedhje të paracaktuara brenda partisë.

Këto deklarata të forta pritet të nxisin debat të gjerë brenda PD-së, duke hedhur dyshime mbi integritetin e procesit të primareve dhe mënyrën se si po trajtohen figurat aktive në opozitën ndaj qeverisë.