Një hetim disamujor dhe veprime proaktive të realizuara nga Policia e Gjirokastrës, në bashkëpunim me Prokurorinë e Gjirokastrës dhe Drejtoria e Përgjithshme Antikorrupsion, ka çuar në finalizimin e operacionit policor të koduar “Kilovati”. Ky operacion ka rezultuar në arrestimin dhe ekzekutimin e masave të sigurisë për 16 shtetas të përfshirë në shpërdorimin e energjisë elektrike dhe vjedhjen e saj.

Hetimi ka zbuluar një rrjet të organizuar, ku punonjës dhe ish-punonjës të OShEE-së në Gjirokastër, në bashkëpunim me qytetarë, instalonin matës të energjisë elektrike pa kontratë për të mundësuar vjedhjen e energjisë. Ky veprim ka sjellë përfitime të kundërligjshme për disa individë, duke dëmtuar rëndë sistemin e furnizimit me energji elektrike.

Masat e sigurisë të ekzekutuara nga Gjykata e Gjirokastrës:
• “Arrest në burg” për 4 shtetas, përgjegjës të grupit dhe specialistë të energjisë;
• “Arrest në shtëpi” për 6 shtetas, përfshirë elektricistë dhe ish-punonjës të OShEE-së;
• “Detyrimi për t’u paraqitur në Policinë Gjyqësore” dhe “Ndalimi për të dalë jashtë shtetit” për 6 qytetarë të akuzuar për vjedhje të energjisë elektrike.

Gjithashtu, gjatë operacionit janë sekuestruar 22 matës energjie elektrike, 13 kuti plastike dhe 9 vula, të përdorura për vendosjen dhe vulosjen e matësve të energjisë, si dhe sende të tjera që shërbenin për aktivitetet kriminale. Po ashtu, janë gjetur dokumente të përdorura për të mbështetur hetimin.

Hetimet kanë zbuluar se punonjësit dhe ish-punonjësit e OShEE-së kanë shpërdoruar detyrën duke siguruar dhe instaluar matës të energjisë pa kontrata, me qëllim vjedhjen e energjisë dhe përfitimin e kundërligjshëm.

Materialet hetimore janë dërguar në Prokurorinë e Gjirokastrës për veprime të mëtejshme, për veprat penale “Shpërdorimi i detyrës” dhe “Vjedhja e energjisë elektrike”. Ky operacion vjen si pjesë e përpjekjeve të autoriteteve për të luftuar korrupsionin dhe veprimtaritë kriminale që dëmtojnë sistemin ekonomik të vendit.