Ish-kryeministri dhe kreu i PD-së, Sali Berisha, ka mbajtur një fjalim të fuqishëm ku ka theksuar rëndësinë e aleancës së tij për një Shqipëri madhështore, duke e cilësuar atë si një program të paprecedentë në historinë e vendit.
“Kalimi nga diktatura në pluralizëm ishte një akt madhështor. Anëtarësimi i Shqipërisë në NATO ishte një akt madhështor. Por këto ishin akte. Shqipëria tani duhet të jetë tërësisht madhështore,” – tha Berisha, duke vënë theksin tek vizioni i tij për të ardhmen e vendit.
Ai e bazoi këtë vizion në katër shtylla kryesore:
1. Paketa e dhembshurisë – që synon përmirësimin e kushteve sociale dhe mbështetjen për qytetarët.
2. Made in Albania – me fokus tek zhvillimi ekonomik, prodhimi dhe krijimi i një klime miqësore për bizneset. “Prodhimi do të bëhet krenari kombëtare”, – theksoi ai.
3. Pastrimi i Shqipërisë nga krimi dhe korrupsioni – Berisha akuzoi qeverinë aktuale për lidhje me bandat kriminale dhe premtoi ndëshkim ligjor për të gjithë të përfshirët. “Nuk bëhet dot Shqipëria madhështore me banda. Ato kanë vetëm një vend: në burg, në burg dhe vetëm në burg”, – deklaroi ai.
4. Shqipëria si epiqendër e teknologjisë së lartë – Berisha foli për nevojën e investimeve në blockchain, kriptomonedha, inteligjencë artificiale dhe energjinë e rinovueshme, duke synuar ta shndërrojë vendin në një superfuqi energjetike në rajon.
Në fjalën e tij, ai nuk i kurseu kritikat ndaj qeverisë dhe zyrtarëve të lartë të përfshirë në çështje kriminale. “Ky është një narkoshtet. Shtëpia do të pastrohet!”, – paralajmëroi ai.
Në përfundim, Berisha e cilësoi Partinë Demokratike si forcën politike më madhështore të pas Luftës së Dytë Botërore, duke sfiduar kundërshtarët e tij politikë dhe premtuar një të ardhme ndryshe për Shqipërinë.
