Gjykata e Posaçme e Apelit ka lënë në fuqi vendimin e Shkallës së Parë për dënimin me 8 muaj burg të ish-kryebashkiakes së Libohovës, Luiza Mandi, për shpërdorim detyre. Megjithatë, në ndryshim nga Shkalla e Parë, Apeli ka pezulluar dënimin me burg dhe e ka konvertuar atë në 1 vit e 4 muaj shërbim prove.
Rasti lidhet me një kallëzim të bërë nga një qytetar, i cili kishte pretenduar se në pronat e tij, bashkia e Libohovës po zhvillonte një projekt zgjerimi rruge, duke angazhuar firmën Alba Kontruksion. Pas këtij projekti, qytetari kishte kërkuar që të riparoheshin dëmet që ishin shkaktuar në tokat e tij, si dhe të pastroheshin dherat dhe inertet.
Megjithatë, gjatë përfundimit të punimeve, denoncuesi vëzhgoi se muri rrethues nuk ishte ndërtuar siç duhej dhe ishte shtrirë në tokat e tij, duke shkaktuar dëme të tjera. Prokuroria e Posaçme nisi hetimet dhe sekuestroi projektin, ku u konstatua se ishte shkelur procedura e shpronësimit, duke rezultuar në një dëm ekonomik për familjen kallëzuese prej 362,480 lekë.
