Presidenti turk, Rexhep Tajip Erdogan, ka reaguar ashpër pas protestave që shpërthyen në Turqi pas arrestimit të kryetarit të Bashkisë së Stambollit, Ekrem Imamoglu. Ai e cilësoi si hipokrizi përpjekjen e opozitës për ta portretizuar këtë ngjarje si çështjen më të rëndësishme të vendit.

“Përpjekjet e opozitës për të portretizuar konfliktet e saj të brendshme apo problemet e saj me ligjin si çështjen më të rëndësishme të vendit janë kulmi i hipokrizisë”, deklaroi Erdogan.

Imamoglu, një nga rivalët kryesorë të Erdoganit dhe një figurë e rëndësishme e opozitës, u arrestua të mërkurën me akuza për korrupsion dhe ndihmë ndaj terrorizmit. Arrestimi i tij shkaktoi protesta të mëdha në të gjithë vendin.

Erdogan shtoi më tej se qeveria e tij nuk ka kohë për “shfaqje opozitare”, as në nivel personal dhe as partiak, duke e bërë të qartë qëndrimin e tij kundër lëvizjeve politike të kundërshtarëve.