I penduari i drejtësisë, Nuredin Dumani, ka bërë një rrëfim tronditës në seancën gjyqësore në GJKKO, duke zbuluar se pas ekzekutimit të ish-shefit të policisë së Komisariatit nr.6, Dritan Lamaj, qëndronte Henrik Hoxhaj.

Dumani deklaroi se kishte pasur një debat me Lamajn pasi ky i fundit e kishte dhunuar gjatë arrestimit të tij. Ai rrëfeu se kur doli nga burgu mësoi për vrasjen e Lamajt dhe se i ishte bërë “qejfi”. Sipas tij, Festim Qoli i kishte treguar se ekzekutimi ishte kryer nga Henrik Hoxhaj.

Pjesë nga dëshmia e Dumanit:

“Mu bë qejfi për këtë. I thashë Festimit do ju jap një drekë atyre çunave. Ai më tha ‘do ja japësh, se vëllai jonë është’, duke iu referuar Henrik Hoxhajt”, u shpreh ai.

Dumani tregoi gjithashtu se e kishte takuar Henrik Hoxhajn në ditëlindjen e Festim Qolit dhe më pas në hotel “Diplomat”, ku diskutuan për atentatet që do të kryenin. Ai zbuloi se gjatë këtyre takimeve ishin planifikuar vrasje të tjera, përfshirë ekzekutimin e Dorian Shkozës, për të cilën ishte paguar 35 mijë euro.

Në dëshminë e tij, ai përmendi emra të tjerë të përfshirë në ngjarje, si Kevis Alla, Asllan Plaku dhe Klevis Alla, të cilët kishin role të ndryshme në atentatet e planifikuara. Dumani rrëfeu gjithashtu se në komunikimet e tij në aplikacionin e enkriptuar “Sky ECC” mbante pseudonimin “Covid19”.

Dëshmia e tij ka tronditur opinionin publik dhe ka shtuar presionin mbi institucionet e drejtësisë për të çuar përpara hetimet mbi grupet kriminale dhe lidhjet e tyre të mundshme me segmente të ndryshme të shoqërisë.