Presidenti i Turqisë, Recep Tayyip Erdogan, ka deklaruar se siguria evropiane nuk mund të garantohet pa praninë dhe kontributin e Ankarasë. Gjatë një konference pas mbledhjes së Këshillit të Ministrave në Ankara, ai theksoi se zhvillimet e fundit në marrëdhëniet Turqi-BE janë premtuese dhe po konfirmojnë rëndësinë strategjike të vendit të tij në arkitekturën e sigurisë evropiane.

Marrëdhëniet me BE dhe qëndrimi për Ukrainën

Erdogan theksoi gatishmërinë e Turqisë për të forcuar marrëdhëniet me BE-në dhe vendet anëtare, por kërkoi respekt të ndërsjellë dhe interes të përbashkët në këtë proces.

Sa i përket luftës në Ukrainë, ai nënvizoi se Turqia ka mbajtur një qëndrim të pavarur dhe të balancuar, duke mos u ndikuar nga presionet e jashtme. Sipas tij, Ankaraja ka vepruar si një faktor stabiliteti, duke promovuar paqen dhe sigurinë rajonale.

Vlerësimi për armëpushimin 30-ditor të propozuar nga Trump

Presidenti turk vlerësoi propozimin e Donald Trump për një armëpushim 30-ditor në Ukrainë, duke e quajtur një nismë të rëndësishme drejt paqes. Ai e konsideroi reagimin e Rusisë ndaj kësaj iniciative si një hap modest, por pozitiv, dhe shprehu shpresën që konflikti të përfundojë sa më shpejt për të shmangur humbjet e mëtejshme njerëzore dhe shkatërrimin.