Kryeministri Edi Rama ka vijuar turin e tij elektoral në jug të vendit, duke u ndalur këtë herë në Gjirokastër, ku i ka udhëzuar kandidatët e Partisë Socialiste që të bindin qytetarët se 11 maji është votë për anëtarësimin e Shqipërisë në Bashkimin Europian.

Në fjalën e tij, Rama iu drejtua demokratëve, duke u kërkuar që kësaj radhe të mos votojnë Sali Berishën, por Edi Ramën, pasi sipas tij, vetëm PS mund të udhëheqë reformat që kërkon Brukseli.

Duke ironizuar Berishën, ai shtoi se Partisë Demokratike mund t’i vijë radha për të qeverisur vetëm kur Shqipëria të jetë anëtare e BE-së, duke nënkuptuar një distancë të madhe kohore.

Marrëveshja me bizneset dhe problemi i ujit në Sarandë

Më herët, në një takim me sipërmarrësit e rinj në Sarandë, Rama rikujtoi marrëveshjen aforfe për deklarimin e netëve të fjetjes në hotele, duke paralajmëruar se ata që nuk pranojnë këtë ofertë do të kenë tatimet në derën e tyre.

Gjithashtu, ai inkurajoi bizneset që të investojnë në Shqipëri, duke theksuar se me anëtarësimin në BE vlera e pronave do të dyfishohet.

Megjithatë, gjatë takimit, një nga të pranishmit e sfidoi kryeministrin duke i kujtuar problemet me ndërprerjen e ujit, një çështje e cila vijon të shqetësojë banorët dhe bizneset në zonën bregdetare.