Londër – Një foshnje e sapolindur është gjetur e vdekur në një qese pazari jashtë Kishës All Saints, në Londër, një ditë më parë. Foshnja u gjet nga një punonjës pastrimi, i cili ka njoftuar menjëherë autoritetet. Policia ka nisur hetimet dhe ka shpallur në kërkim nënën e foshnjës, e cila dyshohet se e ka braktisur.

Në një konferencë për shtyp, inspektori Owen Renowden tha: “Oficerët kanë punuar gjatë natës dhe vazhdojnë hetimet këtë mëngjes për të gjetur nënën. Foshnja u gjet në një çantë pazarje Marks & Spencer me figura avokadoje.” Sipas tij, foshnja ishte shpallur e vdekur në vend nga shërbimi ambulant.

Policia ka konfirmuar se foshnja ishte një djalë dhe besohet se ishte e sapolindur. Një dëshmitar ka deklaruar se ka parë një çift që kishte lënë çantën në vendin e ngjarjes, rreth orës 10:00. Ata u dukën të shqetësuar dhe kërkonin diçka pranë një koshi plehrash.

Në vendin e ngjarjes janë vendosur lule dhe një lodër si homazhe për foshnjën, ndërkohë që hetimet vazhdojnë për zbardhjen e ngjarjes.