Babai i 17-vjeçarit që mbeti i plagosur një ditë më parë në Sarandë ka dhënë detaje mbi ngjarjen. Sipas tij, djali i tij po merr ndihmë mjekësore në Spitalin Rajonal të Vlorës, ku gjendja e tij shëndetësore është jashtë rrezikut për jetën, pasi thika nuk ka prekur organet jetësore. 17-vjeçari është goditur tri herë me thikë, në stomak dhe në këmbë.

Babai tregon se konflikti ka nisur më herët, më 22 mars, kur djali i tij ishte goditur disa herë me levë nga të njëjtët persona. Nga frika e kërcënimeve, ai i kishte thënë familjarëve dhe policisë se ishte rrëzuar nga shkallët. Megjithatë, më 27 mars, djali i tij është sulmuar sërish nga agresorët, duke u goditur kësaj here me thikë.

Ai kërkon me ngulm nga policia e Sarandës që të arrestojë të gjithë personat e përfshirë në këtë ngjarje të rëndë. Hetimet për këtë incident janë duke vazhduar.