Kryetari i Partisë Demokratike, Sali Berisha, ka bërë thirrje për një përdorim maksimal të rrjeteve sociale nga kandidatët për deputetë, duke e cilësuar këtë si një mjet kyç në fushatë. Ai ka marrë si shembull fitoren e Donald Trump në vitin 2016, duke theksuar se ish-presidenti amerikan arriti suksesin e tij politik përmes mediave sociale.

Berisha ka apeluar gjithashtu që qytetarët të përdorin VPN për të aksesuar TikTok-un, pas vendimit të qeverisë për ta bllokuar atë në Shqipëri. Ai e ka quajtur këtë bllokim një përpjekje për të kontrolluar lirinë e fjalës dhe mendimin e qytetarëve.

“Le t’i ndezim rrjetet sociale si asnjëherë tjetër. Në vitin 2016, Donald Trump fitoi përmes mediave sociale, sepse mediat tradicionale nuk ishin me të. Ne duhet të kombinojmë fuqinë e takimeve me qytetarët dhe ndikimin në rrjete sociale,” – deklaroi Berisha.

Ai kritikoi ashpër kundërshtarët politikë, duke i cilësuar si një grup të përçarë dhe të paaftë për të ofruar alternativë. Sipas tij, përpjekjet për të kontrolluar internetin dhe informacionin janë dëshmi e frikës nga fuqia e rrjeteve sociale në politikë.