Qytetarët e Stambollit iu përgjigjën thirrjes së opozitës për bojkot 24-orësh, duke lënë bosh lokalet, supermarketet dhe bizneset e tjera. Kjo nismë u ndërmor në shenjë proteste ndaj rritjes së çmimeve dhe krizës ekonomike që ka goditur Turqinë.

Gjendja ekonomike në vend është përkeqësuar ndjeshëm, me inflacionin në rritje dhe rënien e vazhdueshme të vlerës së monedhës vendase. Aktualisht, një Euro këmbehet me afro 41 Lira, ndërsa një Dollar me afro 38 Lira turke.

Bojkoti ka prekur edhe median, pasi opozita u ka bërë thirrje qytetarëve të mos ndjekin televizionet pro-qeveritare, duke shkaktuar një rënie të ndjeshme të audiencës.

Ky reagim vjen pas arrestimit të kryebashkiakut të Stambollit, Ekrem Imamoglu, një figurë e rëndësishme e opozitës. Për disa ditë rresht, qytetarët kanë mbushur rrugët në protesta kundër qeverisë, duke kërkuar lirimin e tij dhe ndryshime në politikat ekonomike.