Amazon ka bërë një ofertë të minutës së fundit për të blerë TikTok-un, aplikacionin e njohur të videove, ndërsa ky i fundit po përballet me afatin e prillit për t’u ndarë nga pronari i tij kinez, ose për t’u përballur me një ndalim në Shtetet e Bashkuara. Burime të informuara kanë theksuar se oferta e Amazon-it, e drejtuar nënpresidentit JD Vance dhe sekretarit të tregtisë Howard Lutnick, nuk është marrë shumë seriozisht nga palët përkatëse.
Ky zhvillim nxjerr në pah shqetësimet e thella të politikës amerikane lidhur me sigurinë kombëtare për shkak të pronësisë kineze të TikTok-ut. Një ligj i miratuar vitin e kaluar kërkonte shitjen e TikTok-ut, një afat që duhej të kishte hyrë në fuqi që në janar.
Presidenti Donald Trump, i cili ka luajtur një rol kyç në këto bisedime, pritet të diskutojë fatin e TikTok-ut me zyrtarë të lartë të Shtëpisë së Bardhë. Përveç mundësisë së investitorëve amerikanë si Oracle dhe Blackstone, ka pasur biseda edhe për mundësinë e shmangies së një shitjeje formale, por ende nuk është e qartë nëse kjo mund të përmbushë kërkesat e ligjit federal.
Amazon ka lidhje të ngushta me TikTok-un, duke përfshirë promovimin e produkteve përmes influencuesve që rekomandojnë artikuj nga platforma e tij e tregtisë elektronike. Më parë, kompania kishte tentuar të krijonte një aplikacion të ngjashëm me TikTok-un, të quajtur Inspire, por ky projekt dështoi.
Tani, oferta e Amazon-it për të blerë TikTok-un hap mundësi të reja për kompaninë, e cila mund të përfitojë nga të dhënat dhe infrastruktura e TikTok-ut për të forcuar më tej pozitat e saj në tregun e blerjeve online.
