Kreu i Partisë Demokratike, Sali Berisha, ka reaguar ndaj komenteve të kryeministrit Edi Rama, i cili e kishte krahasuar atë me “bufin e kënetës”. Gjatë një takimi me banorët e Baldushkut, Berisha u shpreh se kryeministri po përpiqet të largojë vëmendjen e qytetarëve nga vjedhjet e qeverisë me deklarata dhe krahasime të tilla.

“Ta lëmë atë të merret me bretkosa e zhaba, pasi ai mendon se kështu bëhet interesante dhe mendon se i bën njerëzit të harrojnë se çfarë detyrimi ka qeveria ndaj tyre, çfarë vjedhje kanë bërë. Ai e ka qëllim këtë. Nuk takon më asnjë gazetar, i shpik ata dhe u përgjigjet, si e si të largojë interesin tuaj”, tha Berisha.

Kryedemokrati i bëri thirrje qytetarëve të votojnë masivisht më 11 maj, duke theksuar se numri 1 është simboli i ndryshimit. “Kam besim se më 11 maj do të votoni 1-shin. 1-shi është pothuajse hyjnor, duke votuar 1 votoni për ndryshimin dhe për veten tuaj”, theksoi ai.

Në fjalën e tij, Berisha preku edhe temën e shërbimeve publike, duke kritikuar platformën e-Albania, të cilën e cilësoi si “telefon i prishur që nuk jep asnjë shërbim”. Ai premtoi rikthimin e zyrave fizike të informacionit për qytetarët.

“Sot kanë hequr qindra punonjës që kanë qenë në zyra për të informuar qytetarët, gjoja me e-Albania. Ajo është bërë si telefon që nuk bie kurrë. Kliko sa të duash, por të plas shpirtin dhe nuk të jep shërbimin”, deklaroi Berisha. Ai theksoi se qeveria e ardhshme do të modernizojë platformën digjitale, por gjithashtu do të rivendosë zyrat e pritjes dhe informacionit, për të garantuar komunikim direkt me qytetarët.

Berisha përmbylli fjalën e tij me një mesazh të qartë për votuesit: “Vetëm me ndryshim real, Shqipëria mund të kthehet te qytetari dhe t’i japë fund shkëputjes nga njerëzit.”