Shqipëria përballet me një alarm serioz shëndetësor pas zbulimit të 2.6 tonëve mish pule të kontaminuara me bakterin salmonela, që tashmë janë konsumuar nga qytetarët. Ky bakter i rrezikshëm mund të shkaktojë infeksione të rënda, sidomos te fëmijët, të moshuarit dhe ata me imunitet të dobësuar.

Simptomat më të zakonshme të infeksionit përfshijnë: diarre, të vjella, dhimbje barku, temperaturë të lartë dhe në raste të rënda, gjak në feçe apo dehidrim të theksuar. Infeksioni shfaqet zakonisht 6 deri në 72 orë pas konsumimit të ushqimeve të kontaminuara, dhe nëse nuk trajtohet, mund të ketë pasoja serioze për shëndetin.

Nutricionistja Albana Daka thekson se “kur simptomat janë të lehta, mund të përballohen me hidratim të mirë, por nëse ato përkeqësohen apo zgjasin më shumë se disa ditë, është e domosdoshme të kërkohet ndihmë mjekësore”. Analiza e koprokulturës është mënyra më e saktë për të zbuluar praninë e salmonelës në trup.

Ekspertët paralajmërojnë se kontaminimi i mishit është një rrezik i madh për shëndetin publik dhe bëjnë apel për kujdes maksimal në përgatitjen e produkteve të mishit. Gatimi i mirë, në temperatura të larta, është thelbësor për të eliminuar bakteret e rrezikshme si salmonela.

“Rreziku është më i madh për fëmijët, të moshuarit dhe ata me sëmundje kronike. Por çdo konsumator duhet të jetë i vëmendshëm. Një sistem i fortë imunitar mund të ndihmojë në përballimin më të lehtë të infeksionit, por kjo nuk e përjashton domosdoshmërinë e higjienës dhe gatimit të sigurt”, shtoi Daka.

Autoritetet shëndetësore po hetojnë origjinën e mishit të kontaminuar dhe bëjnë thirrje për kontrolle më të rrepta dhe ndëshkime për shkelësit. Në këtë situatë, vëmendja e konsumatorëve dhe përgjegjshmëria e tregtarëve janë thelbësore për të parandaluar përhapjen e mëtejshme të rrezikut.