Një aksident rrugor është shënuar ditën e sotme në kryqëzimin e Gjadrit, ku dy automjete që lëviznin në drejtimet Shkodër-Lezhë dhe Kodhel-Gjadër janë përplasur. Për fat të mirë, nuk raportohet për të lënduar, ndërsa dëmet janë vetëm materiale.

Sipas verifikimeve paraprake, drejtuesit e mjeteve nuk kanë qenë nën ndikimin e alkoolit në momentin e përplasjes. Autoritetet janë në vendngjarje dhe po kryejnë veprimet administrative dhe hetimet e nevojshme për të përcaktuar shkakun e aksidentit.

Policia u bën thirrje të gjithë drejtuesve të mjeteve që të tregojnë kujdes të shtuar në kryqëzime dhe të respektojnë rregullat e qarkullimit rrugor, për të shmangur ngjarje të tilla.