Kongresi i 49-të i UEFA-s, i mbajtur në Beograd, nuk kaloi pa tensione diplomatike, pasi simbolet shtetërore të Kosovës u hoqën nga tavolina pas përfundimit të mbledhjes, duke shkaktuar reagime të forta nga Federata e Futbollit të Kosovës (FFK).

Kosova ishte përfaqësuar zyrtarisht me flamurin dhe simbolet shtetërore, në përputhje me statusin e saj si anëtare me të drejta të plota në UEFA. Megjithatë, pas largimit të presidentit të FFK-së nga salla, simbolet e Kosovës u hoqën në mënyrë të njëanshme.

FFK reagoi menjëherë duke deklaruar:

“Çdo veprim i mundshëm në përfundim të mbledhjes, kur presidenti i FFK-së nuk ishte më në sallë, nuk e ndryshon faktin se Kosova ishte dhe mbetet pjesë e barabartë e këtij organizimi.”

Nga ana tjetër, Federata Serbe e Futbollit e cilësoi incidentin si të korrigjuar, ndërsa mohoi prezencën zyrtare të flamurit të Kosovës, duke deklaruar:

“Reaguam shpejt dhe me vendosmëri. Me përgjegjësi të plotë informojmë opinionin se në Kongresin e UEFA-s në Beograd nuk ka flamuj të të ashtuquajturës Kosovë.”

Ky incident rihap debatet për statusin e Kosovës në arenën ndërkombëtare sportive dhe sfidat që ajo përballet, edhe pse është anëtare me të drejta të plota e UEFA-s dhe FIFA-s. Për momentin, UEFA nuk ka bërë ende një koment zyrtar për situatën.