Në një kohë kur numri i krerëve të gjedhëve në Shqipëri po bie ndjeshëm, kërkesat për qumësht dhe nënproduktet e tij janë në rritje të vazhdueshme, sidomos për shkak të fluksit të turistëve dhe konsumit të brendshëm. Përballë këtij disbalanci, industritë ushqimore po përdorin vaj palme për të plotësuar volumin dhe për të ulur kostot, duke e servirur këtë përzierje si “qumësht i ambalazhuar”.

Sipas ekspertit të sigurisë ushqimore, Sokol Abazi, vaji i palmës përdoret për të shtuar yndyrë artificiale në produktet e qumështit, sidomos pasi nga përpunimi i tij hiqet gjalpi dhe mbetet një lëng me pak yndyrë. Për të përmbushur standardet dhe për ta hedhur sërish në treg, industritë shtojnë vaj palme, një yndyrë bimore shumë më e lirë se yndyra shtazore.

“Nuk është më qumësht,” – thotë Abazi, – “por një nënprodukt bimor i paraqitur si ushqim shtazor. Kjo është mashtrim për konsumatorin.”

Në vitin 2024, në Shqipëri janë importuar 2.9 milion litra vaj palme, një shifër që përkon me rritjen e konsumit të qumështit të përpunuar. Por kjo zgjidhje ka pasoja për shëndetin publik, paralajmëron një nutricioniste:

“Vaji i palmës, si çdo yndyrë e ngopur, ka tendencën të grumbullohet në enët e gjakut dhe shkakton probleme serioze shëndetësore: sëmundje kardiovaskulare, tension, diabet, dhe dëmtime të veshkave.”

Për më tepër, problemet me qumështin nuk ndalen tek vaji i palmës. Analizat laboratorike tregojnë praninë e mikrobeve të rrezikshme si stafilokoku dhe enterobaktere, të cilat vijnë nga mungesa e higjienës dhe rënia e numrit të veterinerëve dhe zooteknikëve, që kanë sjellë moskujdesje për shëndetin e kafshëve.

Në vend që të mbështetet blegtoria vendase dhe të rritet kontrolli ushqimor, industria po i drejtohet zgjidhjeve të rrezikshme dhe mashtruese për konsumatorin shqiptar.