Ka ndërruar jetë në spital 15-vjeçari nga Durrësi, Erion Boba, i cili u plagos rëndë me thikë nga një bashkëmoshatar pak ditë më parë. Lajmi i trishtë ka tronditur familjen, të afërmit dhe mbarë komunitetin, që për 10 ditë me radhë kanë shpresuar se i mituri do t’ia dilte.

Vetëm dy orë para ndarjes së tij nga jeta, JOQ Albania publikoi apelin e familjes, e cila kërkonte mbledhjen e fondeve për ta dërguar Erionin jashtë vendit, pasi gjendja e tij ishte tepër kritike. Pavarësisht përpjekjeve të mjekëve dhe lutjeve të familjarëve, 15-vjeçari nuk arriti të mbijetojë.

Ngjarja e rëndë nisi pas një konflikti të shfaqur fillimisht në rrjetet sociale, i cili degradoi në dhunë fizike. Gjatë përplasjes, Erioni u godit me thikë disa herë; njëra nga goditjet i preku zemrën, duke e futur menjëherë në rrezik për jetën. Ai u mbajt për 10 ditë në reanimacionin qendror të QSUT-së, duke luftuar mes jetës dhe vdekjes.