Manchester, 6 prill 2025 – Një mbrëmje spektakolare për sportin shqiptar dhe një tjetër faqe e artë në karrierën e Jurgen Uldedajt, boksierit shqiptar që po ngjitet me shpejtësi drejt majës së boksit profesionist ndërkombëtar. Në një përballje të fortë në Co-Op Manchester Arena, arena më e madhe e brendshme në Europë, Uldedaj siguroi fitoren e tij të 20-të në mënyrë dominuese kundër kampionit kilian Mellado, duke triumfuar në të gjitha raundet.
Nën fanellën e klubit prestigjioz anglez Queensberry Promotions, dhe me mbështetjen e Frank Warren, një prej promotorëve më të njohur të boksit në botë, Uldedaj po shënon hapa të rëndësishëm drejt titullit të madh botëror.
Kjo fitore, më shumë se një tjetër statistikë në rekordet e tij, është një hap vendimtar drejt një dueli për kampion bote, i cili do të sillte për herë të parë emrin e Shqipërisë në librin e artë të kampionëve të boksit profesionist.
Arenën e Manchester-it e mbushën shqiptarë nga Anglia dhe e gjithë Europa, që krijuan një atmosferë të zjarrtë, duke e mbështetur Jurgenin me flamuj, thirrje dhe krenari të jashtëzakonshme.
“Faleminderit të gjithë shqiptarëve që më qëndruan pranë, që bënë këtë fitore edhe më të madhe. Kjo është për ju, për Shqipërinë dhe për të gjithë ata që besojnë te ëndrra,” tha Uldedaj pas ndeshjes, i emocionuar dhe i vendosur për të çuar më tej betejën drejt titullit.
Tani, sytë janë drejt së ardhmes: me një rekord të pastër dhe një mbështetje gjithnjë në rritje, Jurgen Uldedaj është më afër se kurrë për të sjellë titullin botëror në Shqipëri – një ëndërr që po merr formë në çdo raund.
