Gjatë prezantimit të kandidatëve për deputetë në degën 6, drejtuesi politik i Koalicionit Euroatlantik, Lulzim Basha, lëshoi akuza të forta ndaj Sali Berishës dhe Edi Ramës, duke i konsideruar si bashkëpunëtorë në prapaskenat politike dhe në ruajtjen e pushtetit përmes pazareve të ndërsjella.

Duke marrë shkas nga përfshirja në listën e Berishës të një kushëriri të Elvis Roshit – figurë e njohur për skandalet e së shkuarës – Basha deklaroi se votimi për listën e Berishës është në fakt votim për Roshin dhe Ilir Metën. “Kjo është beteja e doktorit kundër Edi Ramës,” ironizoi ai, duke theksuar se bashkëpunimi mes tyre del në pah përditë.

“Berisha dhe Rama kanë bashkë pushtetin, listat, mediat dhe interesat korruptive”

Sipas Bashës, marrëveshja mes Ramës dhe Berishës nuk është më sekret:
• “Bashkë e kanë pushtetin, bashkë e kanë kryetarin e Bashkisë së Shkodrës, bashkë i bënë listat, bashkë kanë interesat ekonomike, nga Mali i Tiranës tek Selman Stermasi.”
Ai shtoi se media të kontrolluara nga të dy palët luajnë rolin e dy fytyrave të së njëjtës monedhë: “një herë nxjerrin Ramën, një herë Berishën, por të dy mbrojnë njëri-tjetrin.”

Goditja ndaj SPAK-ut si projekt i përbashkët

Basha theksoi se “goditja finale” e këtij bashkëpunimi është sulmi ndaj SPAK-ut:
“Plani është i qartë – të ruajnë privilegjet, të mbulojnë korrupsionin dhe të shkatërrojnë SPAK-un.”
Ai akuzoi Berishën për votat që, sipas tij, i ka dhënë Edi Ramës për të shpëtuar 111 të korruptuar:
“Pa votat e tij, Edi Rama nuk mund të lironte të korruptuarit.”

“Pazar-opozita” dhe përpjekja për monopol politik

Në përfundim të fjalës së tij, Basha akuzoi Berishën se po përpiqet të monopolizojë opozitën për interesa personale dhe në marrëveshje me qeverinë:
“Pushteti i korruptuar i Edi Ramës me një pseudoopozitë, një pazar-opozitë, me doktor pazarin në krye – kjo është loja që po luhet.”

Mes thirrjeve për ndarjen nga e kaluara dhe për një alternativë të re euroatlantike, Basha kërkoi mbështetjen e qytetarëve për të “çliruar” politikën nga simbioza Rama-Berisha-Meta dhe për të kthyer besimin te drejtësia dhe institucionet.