Greqia vazhdon të përballet me aktivitet të lartë sizmik. Mbrëmjen e së dielës, një tjetër tërmet është regjistruar në pjesën perëndimore të vendit, pranë qytetit të Patrës.

Sipas Qendrës Europiane të Sizmologjisë (EMSC), tërmeti ka pasur një magnitudë prej 4.9 të shkallës Rihter, me epiqendër rreth 25 kilometra nga qyteti i Patras. Lëkundjet janë ndjerë në disa zona përreth dhe kanë shkaktuar shqetësim te banorët, por deri në këto momente nuk raportohen dëme materiale apo të lënduar.

Tërmeti i së dielës vjen vetëm pak javë pasi në ishullin e Santorinit janë regjistruar me mijëra lëkundje të vogla, duke nxitur vëmendjen e autoriteteve dhe ekspertëve për një periudhë të pazakontë aktiviteti sizmik në vend.

Greqia ndodhet në një nga zonat më aktive sizmike të Evropës, dhe tërmetet e përmasave të ndryshme janë një dukuri relativisht e zakonshme. Autoritetet vijojnë të monitorojnë situatën, ndërsa qytetarët këshillohen të ndjekin udhëzimet e sigurisë në rast të lëkundjeve të tjera.