Ish-kryetari i Bashkisë së Tiranës dhe anëtar i Partisë Socialiste, Erion Veliaj, është një nga figurat politike shqiptare më të përfolura të momentit, pas arrestimit të tij në muajin shkurt me nëntë akuza penale, përfshirë korrupsion, shpërdorim detyre dhe pastrim parash.

Veliaj, i njohur edhe për lidhjet e tij të ngushta me figura ndërkombëtare, ka pasur një raport të afërt me Alex Soros, kryetarin e Open Society Foundations dhe djalin e miliarderit George Soros. Në rrjetet sociale gjenden fotografi dhe postime të ndërsjella mes Veliajt dhe Alex Soros, që dëshmojnë marrëdhënien e tyre miqësore. Në shtator të vitit 2023, Alex Soros publikoi një foto nga stadiumi “Air Albania”, ku shfaqej me Veliajn, ndërsa në një tjetër postim në shkurt 2024, ishte vetë Veliaj ai që ndau një foto me Sorosin duke e quajtur “vëllai im”.

Ndërkohë, hetimet ndaj Veliajt po zbulojnë gjithnjë e më shumë aspekte të errëta të pasurisë së tij. Gruaja e tij është gjithashtu nën hetim, pasi është vërtetuar se ka shpenzuar shuma të mëdha për artikuj luksi, me një vlerë totale që arrin në afro 800,000 euro – një shumë që bie në sy, duke marrë parasysh se paga maksimale e kryebashkiakut është rreth 3,000 euro në muaj.

Kjo çështje ka tronditur opinionin publik në Shqipëri dhe ka hapur diskutime të gjera mbi lidhjet mes politikës, pushtetit dhe oligarkisë ndërkombëtare. Hetimet po vijojnë dhe pritet që ditët në vijim të sjellin zhvillime të tjera lidhur me rrjetin e korrupsionit ku dyshohet të jetë përfshirë Veliaj dhe bashkëpunëtorët e tij.