Ngjarja tragjike e ndodhur mbrëmjen e 6 prillit në Itali, ku u vra shqiptari Vladimir Topjana, 43 vjeç, ka marrë dimensione të reja pas zbardhjes së detajeve nga mediat italiane. Topjana, i cili ndodhej me djalin e tij 17-vjeçar për të ndjekur ndeshjen Roma-Juventus, u qëllua për vdekje pas një sherri me një bashkëatdhetar shqiptar.

Autori i dyshuar i vrasjes është Roger Shota, 34 vjeç, i cili ndodhej në vendngjarje së bashku me babain e tij, Pren Shota, 66 vjeç. Të dy janë arrestuar nga autoritetet italiane. Motivi i vrasjes dyshohet se lidhet me konflikte për çështje pronash mes palëve.

Sipas hetimeve, Topjana ishte duke folur me një të afërm në parkimin e makinave, kur një makinë e bardhë iu afrua. Brenda saj ndodheshin Roger dhe Pren Shota. Pas një debati verbal, Roger Shota ka dalë nga mjeti, ka nxjerrë një pistoletë Beretta 7.65 dhe ka qëlluar viktimën, duke i shkaktuar vdekjen e menjëhershme.

Autori u përpoq të largohej nga vendngjarja, por u ndalua dhe u arrestua nga policia. Arma e krimit, e cila rezulton të jetë e vjedhur në gusht 2024 në Ravena, u gjet në makinën e tij.

Vladimir Topjana, i cili prej vitesh jetonte dhe punonte si shofer në Itali, u bë viktimë e një konflikti të përshkallëzuar tragjikisht, në prani të djalit të tij të mitur. Ndërkohë, autoritetet italiane po vijojnë hetimet për të dokumentuar plotësisht rrethanat e ngjarjes dhe për të zbuluar nëse pas saj qëndron një përplasje më e thellë brenda komunitetit shqiptar atje.