Ministri i Ekonomisë, Kulturës dhe Inovacionit, Blendi Gonxhja, i cili kandidon për deputet në listë të hapur në Tiranë, foli së fundmi në një emision televiziv mbi dinamikën e garës brenda radhëve të Partisë Socialiste.

Në një deklaratë që reflekton ton bashkëpunues dhe vetëdije politike, Gonxhja theksoi se konkurrenca e brendshme nuk po kthehet në përplasje, por po zhvillohet me përgjegjësi dhe profesionalizëm.

“Unë mendoj se deri tani jemi në një situatë normaliteti pune, në komunikim me elektoratin dhe në raport me njësitë administrative,” – u shpreh ai. “Kjo konkurrencë, nëse arrihet të menaxhohet me zgjuarsi dhe maturi, do të ishte një sukses i plotë.”

Një garë komplekse, por e shëndetshme

Duke e cilësuar garën në listën e hapur si të “komplekse”, por të menaxhueshme, ministri vuri në dukje rëndësinë që kjo të mos cënojë strukturën organizative të PS-së në njësitë lokale.

“Është normale që të gjithë të lëvizin nëpër qark, pasi janë zgjedhje për qarkun, me kusht që të mos dëmtojnë organizatën. Nuk duhet të shkatërrojmë punën, të turbullojmë apo të ndërhyjmë në funksionimin e organizatave ekzistuese.”

Ai shtoi gjithashtu se shumë individë në komunitet ende nuk janë të identifikuar nga partia, ndaj përpjekjet e kandidatëve duhet të përqendrohen edhe te ata qytetarë që i përkasin “zonës gri”.

Gonxhja: Të jemi korrektë dhe të përulur

Në një deklaratë që reflekton vetëpërmbajtje dhe ndjeshmëri politike, Gonxhja tha:

“Të 37 nuk mund të fitojmë. Jemi të rritur, jemi të pjekur. Unë duhet të jem ndër të parët në atë listë që duhet të tregojnë takt maksimal dhe të punojnë fort. Sepse vij me një avantazh nga posti që mbaj. Duhet të vij me korrektesë përballë atyre që nuk kanë njohjet e mia.”

Ai mbylli deklaratën me theksin se nuk ka asnjë arsye për ankesë ndaj përzgjedhjes së kandidatëve, duke u shfaqur i sigurt për një garë dinjitoze dhe konstruktive.