Partia Socialiste çeli sot zyrtarisht fushatën për zgjedhjet e përgjithshme të 11 majit në një tubim madhështor në sheshin “Skënderbej” në Tiranë. Nën moton “Shqipëria 2030 në BE”, PS theksoi objektivin e saj strategjik: integrimin europian të vendit.

Skena e ndërtuar për këtë rast kishte në qendër simbolikën e 12 yjeve të flamurit të Bashkimit Europian. Ngjarja nisi me prezantimin e kandidatëve për deputetë në 12 qarqet e vendit dhe u shoqërua me performanca të këngëve dhe valleve tradicionale shqiptare, duke përçuar mesazhin e unitetit dhe identitetit kombëtar.

Blendi Klosi: PS-ja fiton sepse ka shqiptarët me vete

Drejtuesi politik i PS-së në qarkun e Dibrës, Blendi Klosi, u shpreh i bindur se Partia Socialiste do të marrë një mbështetje masive në këtë qark. Ai theksoi se PS është një forcë politike me 100 mijë anëtarë dhe 1 milion votues, e drejtuar nga një lider vizionar si Edi Rama, i cili ka transformuar Shqipërinë dhe e ka përgatitur për anëtarësim në BE.

“Ky shesh i madh është simbol i transformimit të Shqipërisë Europiane. Ne besojmë fort te kjo forcë politike që ka shumë organizim, frymë dhe mbi të gjitha një lider që atë që premton e bën,” tha Klosi.

Belinda Balluku: Ky është mandati i shqiptarëve për BE

Drejtuesja politike e PS-së në qarkun e Fierit, Belinda Balluku, e përqendroi fjalën e saj në nevojën për një mandat të katërt, të cilin e cilësoi si “mandati i shqiptarëve për të çuar Shqipërinë në BE”.

“Kërkojmë një mandat të katërt për të përmbushur marrëveshjen me popullin që Edi Rama nisi në 2013. Ky është një moment historik për të forcuar themelet e Shqipërisë dhe për t’u ulur në tryezën europiane që na takon me të drejtë,” u shpreh Balluku.

Ajo bëri të ditur edhe objektivin konkret për qarkun Fier: 10 mandate, duke shtuar se “me Edi Ramën në krye, nuk ka asgjë që na ndal.”