Është identifikuar i dashuri shqiptar i Ornella Forastefanos, 46-vjeçares e cila dyshohet se u dhunua rëndë dhe më pas u la në dyert e një spitali në Kalabri, ku edhe humbi jetën.

Mediat italiane raportojnë se bëhet fjalë për Elvis Metvelaj, 40 vjeç, me origjinë shqiptare, i cili është personi i dyshuar nga autoritetet italiane për vdekjen e 46-vjeçares.

Sipas informacioneve paraprake, Metvelaj dhe Forastefano kishin një lidhje prej kohësh, por marrëdhënia e tyre nuk ishte pranuar nga familjarët e gruas.

Familja e 46-vjeçares është e njohur në zonë për përfshirje të mëparshme në hetime të antimafias. Megjithatë, autoritetet italiane bëjnë të ditur se deri në këtë fazë nuk ka elementë që e lidhin ngjarjen me aktivitetet e mëparshme të familjes.

Edhe Metvelaj nuk është një emër i panjohur për drejtësinë italiane. Sipas mediave, ai ishte arrestuar në vitin 2020, në kuadër të një hetimi për trafik droge.

Një nga pistat që po verifikohet nga hetuesit lidhet me vendin ku ka ndodhur sulmi ndaj 46-vjeçares. Dyshimet janë se gruaja mund të jetë transportuar drejt spitalit pasi ishte dhunuar.

Për zbardhjen e plotë të ngjarjes priten rezultatet e ekzaminimeve mjeko-ligjore, ndërsa hetuesit po analizojnë edhe kamerat e sigurisë dhe komunikimet telefonike.

Këto prova pritet të ndihmojnë autoritetet italiane për të përcaktuar shkakun e saktë të vdekjes së Ornella Forastefanos dhe, mbi të gjitha, rolin që ka pasur 40-vjeçari shqiptar në ngjarjen e rëndë.