Në vijim të fushatës për zgjedhjet e 11 majit, Sali Berisha zhvilloi një takim entuziast me shqiptarët e diasporës në Brescia, Itali, ku mbajti një fjalim të ngrohtë e frymëzues, duke vlerësuar lart kontributin dhe sakrificën e tyre.

“Ju falënderoj për frymën e fitores që krijuat ju shqiptarët e diasporës,” – tha Berisha në hapje, duke theksuar se ky takim në Brescia është stacioni i tij i parë pas nisjes së fushatës.

Ai e cilësoi vitin 2025 si vitin e diasporës, vitin e fitores mbi diktaturën e drogës dhe krimit, vitin e shpëtimit të Shqipërisë.

“Fushata e këtij viti është madhështore dhe shpresëdhënëse, falë jush dhe diasporës,” – u shpreh Berisha.

Në fjalën e tij, ish-kryeministri nderoi historinë e shqiptarëve në Itali, duke i quajtur “njerëz të sakrificës dhe suksesit”, të cilët erdhën nga diktatura më e egër dhe u përballën me të panjohurat në një vend të huaj, por që gjetën mikpritjen dhe bujarinë e popullit italian.

“Takimi me ju është takim me sakrificën e njeriut. Viva Italia!” – përfundoi Berisha, duke përcjellë një mesazh falënderimi për Italinë dhe një thirrje për bashkim dhe ndryshim në zgjedhjet e ardhshme.