Berlin – Një mjek 40-vjeçar ka rënë në qendër të një skandali të rëndë pas akuzave për vrasjen e 15 pacientëve të tij, të cilëve dyshohet t’u ketë administruar një koktej vdekjeprurës medikamentesh. Mjeku, i identifikuar si Johannes M., është akuzuar për kryerjen e këtyre veprimeve, duke i administruar pacientëve anestezikë dhe relaksues muskujsh pa dijeninë apo miratimin e tyre.

Viktimat, të cilat përbëheshin nga 12 gra dhe 3 burra të moshave nga 25 deri në 94 vjeç, vdiqën ndërmjet shtatorit 2021 dhe korrikut 2024. Hetuesit thonë se mjeku i ka shkaktuar paralizë të muskujve të frymëmarrjes, duke çuar në ndalim të frymëmarrjes dhe vdekje të shpejtë.

Prokurorët e kanë cilësuar veprimin e tij si një akt të dëshpëruar të “epshit për vrasje”, ndërsa autoritetet po hetojnë pesë raste të tjera, ku mjeku dyshohet se ka përpjekur të fshehë krimet duke vënë zjarr në banesat e viktimave. Disa prej këtyre përpjekjeve për të fshirë gjurmët e krimit nuk kanë pasur sukses.

Mjeku është arrestuar dhe po përballet me akuza të rënda për vrasje dhe manipulim të provave. Hetimet vijojnë për të zbardhur plotësisht shkaqet dhe rrethanat e ngjarjeve.