Atalanta ka lënë pas garën për titullin kampion, por lufta për një vend në Champions League vazhdon me vendosmëri. Një qëllim i qartë për bergamaskët, që vjen i konfirmuar nga kapiteni kuqezi, Berat Gjimshiti.

Në një intervistë për mediat italiane, mbrojtësi i kombëtares shqiptare tregoi përqendrimin dhe motivimin që mbizotëron në ekip, sidomos pas fitores së rëndësishme ndaj Bolognës.

“Kemi rifituar besimin,” u shpreh Gjimshiti, duke vlerësuar ndikimin psikologjik të fitores në kampionat. Tashmë, përpara është sfida me Milanin, një transfertë e vështirë dhe me shumë peshë në garën për zonën Champions.

Por Gjimshiti nuk bie pre e retorikës së finaleve:
“Nuk e shoh si një përballje përcaktuese. Ne nuk bëjmë llogari. E vetmja gjë që mendojmë është të fitojmë çdo ndeshje. Ky është qëllimi ynë,” theksoi ai me vendosmëri.

Megjithëse vazhdon të luajë me dhimbje për shkak të një dëmtimi në kavilje, mbrojtësi shqiptar mbetet një shtyllë e mbrojtjes për trajnerin Gasperini, i cili shpreson ta ketë në maksimum për fazën më vendimtare të sezonit.