Chris LaCivita, një nga arkitektët kryesorë të fitores së Donald Trump në zgjedhjet presidenciale të vitit 2024, duket se është “zhdukur” nga vëmendja e publikut shqiptar dhe më nuk ndodhet në Tiranë – aty ku, sipas pretendimeve të mëparshme, kishte një rol aktiv në këshillimin e opozitës shqiptare.

Por ndërsa në Shqipëri zëri i tij është heshtur, në Australi emri i LaCivita-s ka bërë jehonë. Një investigim i publikuar nga Correctiv dhe Climate Reporting Centre zbuloi se strategu republikan ka zhvilluar një vizitë të fshehtë në Australi, ku sipas tij, ka dhënë konsulencë për Partinë Liberale në lidhje me “çështje strukturore” të lidha me liderin Peter Dutton.

Në regjistrime të bëra në mënyrë të fshehtë, LaCivita tha: “Isha në Australi dy javë më parë… për disa nga problemet strukturore që kishin me Peter Dutton.” Ai këmbënguli se udhëtimi ishte në cilësinë e konsulentit privat dhe jo si përfaqësues i presidentit Trump apo Shtëpisë së Bardhë.

Në një tjetër deklaratë për mediat australiane, ai mohoi përfshirjen zyrtare me Partinë Liberale dhe tha se nuk e kishte takuar kurrë Peter Dutton, por do të donte ta bënte “kur të zgjidhet kryeministër”.

Kjo lëvizje ka ndezur spekulime për tërheqjen ose mospërfshirjen e tij në mënyrë aktive në skenën politike shqiptare, ku emri i LaCivita-s u përfol si pjesë e fushatës së Partisë Demokratike. Megjithatë, mungesa e tij në Tiranë dhe heshtja që e shoqëron pas suksesit të fushatës së Trump e bëjnë të qartë se vëmendja e tij është zhvendosur diku tjetër – ndoshta atje ku influenca e tij ka më shumë peshë dhe ku politika është në prag të zgjedhjeve, si në Australi.

Përse nuk ndodhet më në Tiranë? A ka përfunduar misioni i tij këshillues në Shqipëri apo u përfshi vetëm në mënyrë sipërfaqësore në atë që u portretizua si aleancë me opozitën shqiptare?