E veshur me një fustan të kuq të ndezur dhe me energjinë e saj të pakrahasueshme skenike, Lady Gaga “elektrizoi” plazhin e famshëm të Copacabana-s në Rio de Janeiro, duke mbledhur rreth **1.6 milionë fansa** në një koncert falas që hyri në histori.

Ylli amerikan hapi performancën me këngën “**Bloody Mary**”, për të vijuar me “**Abracadabra**”, një nga hitet më të spikatura nga albumi i saj i ri **“Mayhem”**, i publikuar në mars. Kjo ishte rikthimi i saj në Brazil pas më shumë se një dekade, që nga koncerti i fundit në vitin 2012.

Rio u përmbyt nga fansa gjatë gjithë javës në pritje të këtij eventi, duke sjellë një ndikim ekonomik të konsiderueshëm. **Këshilli bashkiak i qytetit ka parashikuar një përfitim rreth 100 milionë dollarë**, shifër që tejkalon me afro 30% koncertin falas të Madonnës në të njëjtin vend një vit më parë.

Kryebashkiaku i Rios, **Eduardo Paes**, ka njoftuar se qyteti do të vazhdojë traditën e **koncerteve falas në muajin maj** për të nxitur turizmin në sezonin e ulët. Ai ka lënë të kuptohet se për vitin e ardhshëm mund të ftohet grupi legjendar irlandez **U2**.

Për garantimin e sigurisë, autoritetet mobilizuan mbi **5 000 oficerë policie**, dronë dhe kamera me **njohje të fytyrës**, duke e kthyer koncertin në një demonstrim modern të sigurisë në ngjarjet masive.

Ky koncert konfirmon edhe një herë fuqinë e Lady Gaga-s për të bashkuar miliona njerëz përmes muzikës dhe spektaklit.